खेलकुद

मूख्यमन्त्री कप: आयोजक सुदूरपश्चिमको जित

धनगढि – मुख्यमन्त्री कप अन्तर प्रदेश खेलकुद प्रतियोगिताको उपाधि आयोजक सुदूरपश्चिम प्रदेशले जितेको छ। तीन स्वर्ण, एक रजत र तीन जित्दै सुदूरपश्चिमले पहिलो स्थान हासिल गरेको हो।

यसैगरी दोस्रो भएको प्रदेश १ ले एक स्वर्ण दुई रजत र तीन कांस्य जित्यो। प्रदेश ५ ले पनि एक स्वर्ण दुई रजत जित्दै तेस्रो स्थान हात पार्‍यो। प्रथम भएको सुदूरपश्चिमले नगद १५ लाख रुपैयाँ प्राप्त गर्‍यो। यस्तै दोस्रो भएको प्रदेश १ ले आठ लाख र तेस्रो भएको प्रदेश ५ ले पाँच लाख रुपैयाँ प्राप्त गरे।

प्रदेश २ र प्रदेश ३ एक स्वर्ण एक रजत पदक जित्दै संयुक्त रुपमा चौथो भए। गण्डकी प्रदेशले तीन रजतसहित पाँचौ हुँदा कर्णाली एक रजतसहित छैटौं भयो।

आइतबार भएको पुरुष फुटबलमा प्रदेश १ लाई ३–१ गोलले हराउँदै सुदूरपश्चिमले स्वर्ण जित्यो। यस्तै प्रदेश २ ले कर्णाली प्रदेशलाई ४–० ले हराउँदै कांस्य पदक पायो।

महिला क्रिकेटमा प्रदेश १ लाई हराउँदै सुदूरपश्चिमले स्वर्ण जित्यो। पुरुष क्रिकेटमा प्रदेश २ ले गण्डकी प्रदेशलाई हराउँदै स्वर्ण जित्यो। प्रदेश १ ले सुदूरपश्चिमलाई हराउँदै कांस्य पदक प्राप्त गर्‍यो।

महिला भलिबलमा प्रदेश ३ ले स्वर्ण जित्यो। प्रदेश ३ ले गण्डकी प्रदेशलाई पराजित गर्‍यो। पुरुष भलिबलमा प्रदेश ५ ले स्वर्ण जित्ने क्रममा गण्डकी प्रदेशलाई पराजित गर्‍यो। ब्याडमिन्टनको यू–१९ पुरुषमा सुदूरपश्चिमका देवराज रानाले स्वर्ण जिते। प्रदेश १ का प्रनिष ठकुरीले रजत तथा सुदूरपश्चिमका अमृत चौधरी र योगेश खड्काले कांस्य पदक पाए। महिलातर्फ प्रदेश १ की नीता लम्सालले स्वर्ण जित्ने क्रममा सुदूरपश्चिमकी निलिमा महरालाई पराजित गरिन्। सुदूरपश्चिमकी विष्णा विष्ट र कर्णाली प्रदेशकी सामना भट्टराईले कास्य जिते। यू–१७ पुरुषतर्फ जेवी सावद पहिलो, रोशन सावद दोस्रो र प्रदेश १ का पेम्बा शेर्पा र सुदूरपश्चिमका प्रियान्सु खत्री तेस्रो भए। महिलातर्फ प्रदेश १ की सीमा राजवंशी प्रथम, अन्जना राई दोस्रो, प्रदेश ५ की कृष्णा वज्राचार्य र सुदूरकी एलिसा तिरुवा तेस्रो भइन्।

सुदुरपश्चिम सरकारको आयोजनामा फागुन २९ गतेदेखि सुरु भएको प्रतियोगितामा सात वटै प्रदेशका साढे ६ सय खेलाडीको सहभागिता रहेको थियो।

Facebook Comments
थप देखाउनुहोस्

सम्बन्धित लेखहरू

Back to top button